政情:回收商叫陣:黃錦星執樽

東方日報 2013-4-15

港府官員不時畀民間團體批評不知業界疾苦,最新被公開挑戰嘅係環境局局長黃錦星(KS)。話說玻璃樽回收計劃諮詢期下月六日結束,有做開回收酒樽嘅代表等唔切政府完整表達政策立場,主動出擊向KS叫陣,要求對方喺諮詢期完結之前,親身落區試下回收酒樽嘅滋味,又講到明嚟得就唔會畀機會KS做騷,總之就要KS見證回收玻璃樽嘅實況喎。

回收商一直對設立固定回收點有一定期望,不過當局一直未有透露對此建議嘅立場。專門喺港島酒吧區回收酒樽嘅香港泥頭車司機協會項目統籌黎梅貞(April)終於睇唔過眼,擔心KS唔係好清楚佢哋嘅苦況,間接會破壞咗整個回收計劃,因此一早化被動為主動,早於二月中旬已經向KS下戰書,要求佢喺諮詢期完結前落區試下回收酒樽嘅滋味。不過事隔近兩個月後,KS都未表態係咪會接招接受挑戰,April惟有再次出招做嘢,明眼人都睇得出用意係提醒KS時限就到,要回應就要快喇。

KS正考慮是否應邀

為咗令KS接招,April其實都對KS做咗好多心理上準備工夫,佢首先表明如果KS肯接招,絕對唔會畀機會對方做騷,並計劃一朝早就拉埋KS到最污糟、最多回收工序嘅灣仔區,體驗下天都未光就要落手落腳執樽,執完樽之後仲要做埋分類工作。

April挑機還挑機,不過始終都係講道理嘅人,佢話一般平時返工時間係清晨六點半至早上十一點,不過佢唔會要KS執足幾個鐘,但係一個鐘就點都走唔甩o架嘞,講到尾最大願望希望KS明白固定回收點對回收商有幾重要,希望政府唔好淨係「錢化」咗個回收計劃,真係出心出力幫下手,批塊地畀佢哋做好回收工作喎。

面對April嘅猛烈攻勢,究竟KS會點樣應對呢?據聞KS正積極考慮係咪應邀出席執樽,不過基於佢早前去完南韓考察,事後要整理份考察報告,之後仲要趕住今個月推出份減廢藍圖,因此一切視乎時間係咪就到喎。究竟KS會否接招應對,相信好快自有分曉。

This entry was posted in 媒體報導. Bookmark the permalink.

Leave a Reply

Your email address will not be published. Required fields are marked *